A industria alimentaria é unha das que máis inviste en innovación, como resposta ás demandas duns consumidores cada día máis informados e sensibilizados. Xa sexa para dar resposta a colectivos con necesidades específicas —celíacos, persoas con intolerancias ou alerxias diversas, veganos, deportistas…— ou para responder a novos gustos e tendencias, a industria incorpora constantemente novos produtos ao mercado. A innovación está incidindo tanto na produción agropecuaria (variedades máis resistentes, con menos graxas, con sabores modificados…) como na industria transformadora, e esténdese a ámbitos como o packaging, que non só busca garantir a conservación e salubridade dos alimentos, senón responder a novas pautas de consumo inducidas por cambios sociolóxicos (singles, cociñas internacionais…), e adecuarse a unha crecente sensibilidade ecolóxica (materiais compostables, redución de residuos, etc.). Nesta mesa coñeceremos, da man dos seus protagonistas, como está afrontando a industria agroalimentaria a innovación ao longo de toda a cadea de valor. Falaremos de como o diálogo cun consumidor cada día máis informado está guiando a innovación en produto, procesos, marketing e distribución.

A biotecnoloxía transformou radicalmente o sector sanitario, con novos medicamentos e novas aproximacións terapéuticas, pero a saúde humana e animal non son os únicos ámbitos que poden beneficiarse dos seus desenvolvementos. Sectores produtivos tan diversos como os da alimentación, a cosmética ou a produción de plásticos están usando a biotecnoloxía para innovar. A biotecnoloxía pode ofrecer á industria novos produtos e procesos máis limpos e sustentables, así como a posibilidade de reducir e valorizar residuos agrícolas, industriais e urbanos. Nesta mesa falaremos das oportunidades e retos que a biotecnoloxía supón para a industria farmacéutica, de como o mercado cosmético reclama cada día máis produtos ‘bio’ e de como os bioprocesos poden axudar ás empresas de diversos sectores a afrontar o reto da sustentabilidade medioambiental.

A substitución dunha economía lineal por unha economía circular máis sustentable require unha aproximación holística ás cadeas de valor produtivas, que teña en conta tanto a sustentabilidade das materias primas (orixe, modo de produción e transporte) como a sustentabilidade dos procesos de transformación e comercialización (consumo enerxético, packaging, distribución). O ciclo complétase coa participación do consumidor, con aspectos clave como a educación e a promoción de pautas de redución de consumo, reutilización de produtos e reciclaxe de materiais. Nesta mesa falarase de como impulsar a economía circular dando novos usos a materiais tradicionais, dos últimos desenvolvementos en materiais para packaging e do reto da valorización de residuos.

Axilidade fronte a dispoñibilidade de recursos. ¿Son estes os respectivos puntos fortes de pemes e grandes empresas á hora de afrontar a innovación? ¿Que as motiva, que as frea? Dous testemuños explícannos como afrontan unhas e outras o reto de innovar.

¿Cal é a mellor opción de financiamento para unha peme innovadora que afronta o reto do crecemento? Capital requirido, control, acompañamento… ¿cales son os factores clave á hora de elixir? Dúas experiencias contrastadas dannos algunhas respostas.

¿Hai que afrontar o reto da internacionalización desde o inicio da actividade empresarial ou é mellor abordala desde unha posición forte no mercado local? ¿Poden avanzar en paralelo unha estratexia local e global? ¿É imprescindible a internacionalización? Dúas empresas cóntannos cales foron as súas opcións.

¿Os produtos gourmet son unha moda? ¿Son a saúde e os alimentos funcionais unha aposta máis segura? ¿Como introducirse neses novos mercados? Dous testemuños para deixarnos bo sabor de boca.

¿É imprescindible contar cun departamento de I+D propio para innovar? ¿Como encontrar o partner adecuado para responder aos retos de innovación dunha empresa? ¿Como hai que xestionar procesos de open innovation?

CELTALGA

H2HYDROPONICS

ORBALLO

LABORATORIOS CIFGA 

AMSLab

DAIRYLAC

SOFTWARE4SCIENCE 

IBÉRICA DE ESPONJAS VEGETALES

HIFAS DA TERRA

NASAS BIOTECH

MOSQUERA VILLAVIDAL

TASTELAB